7:55 ديال الصباح يالله كتفيق حيت منعسش مزيان وحيت راك غير في الداخلية ، لمهم في الكولوار كتلاقا مع جميع تعابير الوجوه ولكن حيت ا نت فايق معطل كتلاقا غير مع البسابس ( هم الثلاميد ديال شعبة PSI في ثانوية محمد الخامس )ومع ال- 5/2 ( أي لي معاودين ألسنة الثانية ديالهم ) كتغسل وجهك وكتمشي تفطر . قبل مكتدخل كتسمع أغاني العيطة بصوت خشن متخافوش هداك غير حميد لخدام تما ولي كتعرفو غير من ريحة كازا لي كيكمي … دابا أرى داك الفطور الملكي : كوميرة صغيرة ، فرماجة وحدة من نوعية غير معروفة شوية ديال المربى ، حليب (نيدو طبعاً) وقهوة عيانة …. شغادي اتدير قالك الميزانية هي هادي …. 8 :25 نت يالله غادي للقسم ، عندك 4h ديال لماط وعاد ماشي أي ماط ، هاد الصباح عندك الطوبولوجي .
كتدخل ( متخافوش ممعطلش حيت أصلاً الأستاد باقي ماجاش ) وملي كيجي كتسمع غير هاك بلاك ، الطوبولوجي كانت كتجيبلي النعاس حيت فيها بزاف ديال التعاريف ، مغاديش نعودلكوم بزاف على هاد الساعتين حيت كنت ناعس في القسم …. 10 كتخرج كتجري باش تمشي لمقصف تشرب اتاي وتاكل الميلفوي وتشد الجماعة على الماتشات ديال البارح كترجع معطل للقسم وفي الطريق كتلاقا مع الحارس العام ليكيسمعك الهدرة ومتقدش تهدر معاه …داكشي ليبقا في الحصة كتحاول تبع مع الاستاد ..12 كتمشي تغدى كتحاول تفكر شنو هاد النهار باش تعرف شنو كاين ف الماكلة ….هاد النهار الثلاثاء كاين دجاج عندك 1/4 دجاجة مع فريت قاسح وعجينة ديال بطاطا وكاس ديال المونادا مجهولة الإسم قبل ماتدخل تاكل خصك تجاوز صف طويل وأنا كندوبل الناس حيت عندي ماتش مهم من بعد البسابس (PSI) لاعبين مع المببيات (mp ) هاد الماتش الأصداء ديالو كتبقى لأيام حيت هو بمتابة الديربي ديال الأقسام التحضيرية . الماتش كيدوز في أجواء نارية ونارية ديال بصح وشكيوقع في بقية النهار غادي نعاودو في التدوينة القادمة .
